Ги гледате сите јазици горе? Ние ги преведуваме сториите на Глобал војсис за светските граѓански медиуми да бидат достапни за сите.

Дознај повеќе за преводите од Лингва  »

· март, 2012

Написи од Заокружено од март, 2012

Македонија: Видео-стримови од граѓанското општество

Во живо.мк е нов сервис наменет за пренесување видео-стримови и снимки на настани од граѓанското општество од Македонија. Првиот настан кој ќе биде покриен е јавната дебата на тема „Какви научни истражувања и настава овозможува новиот Закон за високо образование?“ закажана за петок, 30 март во ГЕМ-клубот во Скопје.

Африка: Како твита Африка

Младите луѓе кои твитаат од нивните мобилни уреди го движат растот на Твитер во Африка, според новото истражување од Портленд наречено „Како твита Африка“ (англиски): „Во првиот обид сеопфатно да се мапира користењето на Твитер во Африка, Портленд и Твитминстер анализираа над 11,5 милиони гео-лоцирани твитови од целиот континент објавени во текот на последните три месеци на 2011 година.“.

Кенија: Војна, оружје и гласови

Какво ќе биде влијанието (на англиски) на војната меѓу Кенија и Ал Шабааб врз изборите во 2012/13 година?: „Се поставуваат низа прашања: дали зголемените безбедносни барања поврзани со заканите од тероризам на Ал Шабааб исто така ќе помогнат да се обезбеди спречување на насилство поврзано со изборите? Или пак безбедносните сили ќе бидат користени во функција на предизборната кампања, како во 2007 година?“

Македонија: Правење хуманитарна книга со интересни твитови

DarjanR, ArsovaM и Angie_Mkd објавија повик за учество во креирање џепна книга со најинтересни твитови и ги поканија другите македонски твитерџии да ги поднесат нивните фаворити. Тие исто се обидуваат да обезбедат од заедницата услуги на дизајн, печатење и издавање. Средствата собрани со продажбата се наменети за хумани цели. Еден од првите што одговори на повикот беше i999y, кој почна да објавува извадоци од неговата збирка смешни твитови на неговиот блог.

Македонија: „Кој сака војна во Македонија?“

Џабир Дерала објаснува на македонски и англиски зашто и како македонската влада е одговорна за тековниот подем на меѓуетничко насилство.

Мозамбик: Вирално видео од бурата над Мапуто

Овој видео-клип од бурата што доаѓа над градот Мапуто стана вирален на Јутјуб, со над 450.000 гледања за само неколку недели. Статистиката покажува дека најмногу гледања биле од Мозамбик, Јужна Африка, Јапонија и Португалија. Последниве месеци, Мозамбик беше погоден од низа циклони.

 

Унгарија: Даночната управа ги испитува граѓанските активисти

Блогот Велеменивезер искоментира (на унгарски) дека веста дека активисти од најпопуларното движење за граѓански права ги проверува Националната даночна и царинска управа е знак на страв од владеачката партија Фидес: „Две години по освојувањето двотретинско мнозинство, веќе фаќаат муви [lat], па бркаат граѓански активисти“. Движењето  кое е цел на тековните владини напори е познато како Милла потекнува од Фејсбук-страницата „Еден милион за слобода на печатот во Унгарија“ (со над 99.000 следбеници) и организираше неколку протести против новиот закон за медиуми и политиките на Владата. Милла планира голем протест на унгарскиот државен празник 15 март.

Македонија: Анализа на Скопје 2014

Јасна Котеска објави (на англиски) анализа на импликациите на проектот Скопје 2014 од гледна точка на концептите развиени од водечките современи филозофи и мислители. Текстот е информативен и читлив, полн со сочни детали за користењето на историјата во формирање нова националистичка идеологија.

Африка: Ткаење на африканскиот сон преку општествени иновации

Гемел ги посочува општествените иновации кои го ткајат африканскиот сон (на англиски): „Технологија во образованието: овој преокт е главниот мотиватор за денешниов пост. Се состои од 48-часовно прибирање идеи, луѓе и дигитални алатки наменети за кеирање нови веб-базирани и мобилни решенија чија цел е да го подобрат учењето меѓу основците и средношколците во Нигерија.“.

Африка: Колку африкански жени се на Интернет?

Гамелмаг прашува (на англиски) колку африкански жени се на Интернет: „Прво, треба да го пронајдеме точниот број на активни женски корисници на Интернет. Следно, треба да ги откриеме факторите кои ги спречуваат жените да го користат вебот, а најнакрај да одредиме мерки кои ќе предизвикаат пресврт на овој тренд“.

Македонија: Блогерска рецензија на „Во земјата на крв и мед“

Внукот се вклучи во дебатата за филмот на Анџелина Џоли (на англиски) нагласувајќи ги техничките недостатоци, а бил најмногу изиритиран од говорот: „Сите ликови во филмот се од босанските говорни подрачја, т.е. го зборуваат тогашниот српско-хрватски, а денешните српски, хрватки и босански јазици. Арно ама, во ова ремек-дело на Енџи наша, од прв до последен, од генерал… па до жртвите што имаат по една реплика пред да добијат куршум во глава, буквално сите, зборуваат како руски мафијаши во американски филм снимен со 5 илјади долари во нечиј подрум. Ако овој концепт ви е далечен, тогаш замислете македонски кандидат за мис / мистер на универзум, свет или нешто слично што се одржува во Кина, како дава интервју на англиски [1, 2, 3] – во филмов е полошо и од тоа!“

Шпанија: 10 години без пезетата

Билјана Велјаноска, Македонка која живее во Шпанија, пишала за десетгодишнината од воведувањето на еврото, како и за кампањата од 2001 според која цените немало да се зголемат. Општо земено, цените сепак се зголемиле (31%) и тоа во поголема мерка од платите (13%). Од друга страна, поефтиниле белата техника и автомобилите. Денес „кога се работи за поголеми суми, средновечните шпанците сакаат да ја имаат пред нив бројката во пезети. Помладите генерации го немаат тој проблем. Тие и не се сеќаваат на неа.“

Македонија: Објавени победниците на наградите „Биди њуз блогер“

Диверсити медиа продукција, непрофитна организација посветена на развој на новинарството, слободата на говорот и демократијата во Македонија, ги објави (на македонски, албански и англиски) победниците на натпреварот за млади њуз блогери:  Новица Наков, Фатлуме Дервиши, и авторките на блогот МК демократија – Моника Петровска и Маја Пероска.