Фоторепортерот Махмуд „Шавкан“ Абу Зеид е ослободен по повеќе од пет години поминати во затвор

Шавкан беше уапсен во август 2013 додека го документираше мирниот протест против симнувањето од власт на поранешниот египетски претседател Мохамед Морси. Фотографија споделена од кампањата „Слобода за Шавкан“ на „Фејсбук“.

По повеќе од пет години поминати во затвор, Махмуд Абу Зеид, попознат како Шавкан, беше ослободен од затвор во Египет на 4 март 2019.

Од кампањата „Слобода за Шавкан“ објавија дека новинарот бил ослободен во понеделникот во раните утрински часови и објавија фотографија од новинарот заедно со татко му и брат му.

Шавкан беше уапсен на 14 август 2013 додека го документираше мирниот протест „Раба Ал-Адавија“ за време на кој поддржувачите на поранешниот египетски претседател Мохамед Морси се собраа да протестираат против државниот удар со кој се стави крај на неговиот претседателски мандат на 3 јули истата година. Според „Хјуман рајтс воч“, египетските безбедносни сили убија најмалку 817 луѓе и повредија многу повеќе во обидот да го растурат протестот.

Шавкан, кој работеше за „Демотикс“ кога беше уапсен, помина речиси четири години во притвор. Тоа всушност претставува кршење на египетскиот закон кој дозволува најмногу две години притвор. Нему му се судеше заедно со 739 други обвинети во случајот што стана познат како „Растурањето во Раба“.

На 8 септември 2018, Кривичниот суд во Каиро го осуди него врз основа на невистинити обвиненија за убиство и поврзаност со Муслиманското братство, кое египетската влада го квалификуваше како терористичка група.

На истото судење, 75 истакнати членови и приврзаници на Муслиманското братство добија смртна казна, а 47 луѓе беа осудени на доживотна робија.

И покрај тоа што помина пет години во затвор, египетските власти го држеа Шавкан во зад решетки без официјално образложение. Во ноември 2018, египетскиот медиум „Мада маср“ откри дека Шавкан и уште 214 други луѓе ќе бидат задржани во затвор уште шест месеци, бидејќи обвинителите ги сметале за неспособни да ги платат штетите настанати за време на мирниот протест и неговото растурање.

Шавкан е ослободен, но тој ќе остане под „полициски надзор“ уште пет години а тоа значи дека ќе треба да се пријавува во полициска станица секој ден на зајдисонце. Тој ќе треба да преноќува во полициската станица сѐ додека не се донесе судски налог за намалување на овие „мерки на претпазливост“.

Слободата на медиумите под заседа 

Слободата на медиумите во Египет останува под заседа со тоа што властите продолжуваат да ги апсат, кривично да ги гонат и да ги малтретираат независните медиумски работници. На 29 јануари, властите од Меѓународниот аеродром во Каиро го притворија новинарот и истражувач за човекови права Ахмед Гамал Зиада при неговото пристигнување од Тунис, каде што студира новинарство. По притворот, Зиада две седмици беше исчезнат сѐ до 13 февруари кога беше осуден за ширење лажни вести на друштвените медиуми. На 2 март тој беше ослободен со кауција по која следи истрага.

На 19 февруари, безбедносните службеници на истиот аеродром го притворија дописникот на „Њујорк тајмс“ Дејвид Д. Киркпатрик при неговото пристигнување, му го конфискуваа телефонот и го држеа седум часа без храна и вода, јави „Њујорк тајмс“. Потоа тој беше протеран назад во Лондон без никакво објаснување.

Започни ја конверзацијата

Автори, ве молиме Најава »

Насоки

  • Сите коментари се модерирани. Не го поставувајте вашиот коментар повеќе од еднаш, бидејќи може да биде идентификуван како спам.
  • Ве молиме однесувајте се кон другите со почит. Коментарите кои содржат омраза, непристојност и лични напади нема да бидат одобрени.