Дали отсекогаш сте сакале да ја посетите Јапонија, но сте немале прилика? Можеби немате време, или авионскиот билет (и сè друго што вклучува одење на одмор) едноставно е прескапо. Не грижете се – каналот на „Јутјуб“ „Kappa2700s“ ја шета Јапонија за вас.

Посветен на „патување, шетање и јадење“, започнат во јули 2012, и досега околу пет милиони луѓе ги погледнале видеата на каналот.

За разлика од многу комерцијално ориентирани канали кои прикачуваат видеа за популарни туристички локации, каналот „Kappa2700s“ има една уникатна одлика: нема коментари од авторот. Наместо тоа, видеата се тивки прошетки низ популарни туристички обележја.

Она што ги прави овие видеа особено корисни за туристите или кој било што го интересира Јапонија е тоа што секое видео вклучува забелешки на англиски, со обележување на времето, кога конкретно туристичко обележје е на екранот.

Корисничкиот профил на „Јутјуб“ „Kappa2700s“ има најмалку двесте видеа од речиси секој дел на Јапонија. Еве само неколку примери.

Источно Кјото

Кјото е една од најпопуларните туристички дестинации во Јапонија, која прими 15 милиони посетители во 2017. Една од најпопуларните туристички дестинации во самиот град е неговата источна страна, каде се наоѓа Хигашијама. Впечатливи моменти од ова видео ги вклучуваат областа околу храмот Кијомизу, маалата Гион и Понточо, тесна уличка полна со ексклузивни чајџилници и мали барови.

Маизуру и Аманохашидате

Лоциран на изолираното и главно рурално крајбрежје на префектурата Кјото на Јапонското Море, Аманохашидате („небескиот лебдечки мост“) е уште едно популарно туристичко место кое сè уште во голема мера е неоткриено од туристите надвор од Јапонија.

Видеото започнува на станицата Осака, со попатно застанување на историската база на морнарицата Маизуру. Ова морнарско гратче е познато по викторијанската архитектура со црвени тули и морнарско кари – карито за првпат било прифатено во Јапонија од Адмиралот Того во седумдесетите години на 19 век.

Видеото завршува со тура низ Аманохашидате.

Курашики

Курашики, во Окојама, западна Јапонија, претставува уште една популарна туристичка дестинација позната по големиот број на реставрирани „кури“ или традиционални јапонски складишта. Со ова видео ќе прошетате низ историскиот кварт Курашики Бикан а потоа продолжувате со тура низ замокот Окајама.

Матцујама и Дого Онсен

Лоциран на северозападниот дел на островот Шикоку, Матцујама е дом на веројатно најпознатиот топол извор во цела Јапонија, Дого Онсен.

Градот ја има „главната улога“ во романот Ботчан (坊っちゃん) на Натсуме Сосеки напишан во 1906, едно од најпознатите јапонски книжевни дела, а главната јавна бања во Дого Онсен претставувала инспирација за бањата во анимираниот филм „Spirited Away“.

Во видеото ја посетуваме главната бања, и исто така има кратка пауза во кафуле во кое се продаваат напитоци и слатки од јузу и други цитрусни овошја кои се одгледуваат во областа Матцујама.

Нагасаки

Нагасаки, кој се наоѓа на островот Кјуши, можеби е најпознат надвор од Јапонија како местото каде беше фрлена втората атомска бомба која ја заврши Втората светска војна. Овој пристанишен град има долга и богата историја благодарение на историските врски со Европа и Кина.

Видеото ги посетува музејот на Атомската бомба во Нагасаки и Паркот на мирот, но исто така ве води и низ градината Гловер и поранешниот дом на Томас Гловер, Шкот кој се населил во Нагасаки непосредно по отворањето на Јапонија кон остатокот од светот кое се случи во шеесетите години на 19 век. Гловер ја играл улогата на „спроводник“ при внесувањето европски технологии — вклучувајќи и оружја — во Јапонија, и можеби придонел државата да почне да го гради својот пат кон Втората светска војна.

Посетете го речиси секој дел од Јапонија преку „Јутјуб“

Овие тури се само многу мал дел од понудата на овој канал. Каналот на „kappa2700s“ има стотици видеа снимени низ цела Јапонија, вклучително и видеа снимени во Нара, античкиот главен град на Јапонија, и Осака, впечатливиот и шаренолик втор најголем град во Јапонија.

А ако сте во сакате да ја видите легендарната планина Фуџи, „kappa2700s“ има видео и за тоа.